ന്യൂയോർക്ക്: നിലവിൽ വിപണിയിൽ നേരിയ മന്ദഗതി നേരിടുന്നുണ്ടെങ്കിലും, ഈ വർഷാവസാനത്തോടെ ആഗോള വിപണിയിൽ സ്വർണ്ണവില സർവ്വകാല റെക്കോർഡുകൾ ഭേദിച്ച് പുതിയ ഉയരങ്ങളിലേക്ക് കുതിക്കുമെന്ന് പ്രമുഖ സാമ്പത്തിക ഗവേഷണ സ്ഥാപനമായ ജെ പി മോർഗൻ. 2026-ന്റെ നാലാം പാദത്തോടെ (Q4) ഒരു ഔൺസ് സ്വർണ്ണത്തിന്റെ വില 6000 ഡോളറിലേക്ക് (ഏകദേശം 5 ലക്ഷത്തിലധികം ഇന്ത്യൻ രൂപ) ഉയർന്നേക്കുമെന്നാണ് പ്രവചനം. 2027-ഓടെ ഇത് 6300 ഡോളർ വരെയാകാനും സാധ്യതയുണ്ട്.
എന്തുകൊണ്ട് സ്വർണ്ണവില വീണ്ടും ഉയരും?
ഈ വർഷത്തിന്റെ തുടക്കത്തിൽ ശക്തമായ മുന്നേറ്റം നടത്തിയ സ്വർണ്ണവില മാർച്ച് മാസത്തോടെ അല്പം സ്ഥിരത കൈവരിക്കുകയും അടുത്തിടെ ഔൺസിന് 4,170 ഡോളർ എന്ന ഈ വർഷത്തെ ഏറ്റവും താഴ്ന്ന നിരക്കിലേക്ക് എത്തുകയും ചെയ്തിരുന്നു. നിലവിൽ ഔൺസിന് 4,340 ഡോളറിനും 4,730 ഡോളറിനും ഇടയിലാണ് അന്താരാഷ്ട്ര വിപണിയിലെ സ്വർണത്തിന്റെ നിരക്ക്.
എങ്കിലും ആഗോള രാഷ്ട്രീയ അനിശ്ചിതത്വങ്ങളും പണപ്പെരുപ്പവും യു എസ് നയങ്ങളും സ്വർണ്ണവിലയെ വരും മാസങ്ങളിൽ വൻതോതിൽ സ്വാധീനിക്കുമെന്നാണ് ജെ പി മോർഗനിലെ ബേസ് ആൻഡ് പ്രെഷ്യസ് മെറ്റൽസ് വിഭാഗം മേധാവി ഗ്രെഗ് ഷിയറർ വിശദീകരിക്കുന്നത്. ആഗോളതലത്തിൽ നിലനിൽക്കുന്ന യുദ്ധങ്ങളും രാഷ്ട്രീയ സംഘർഷങ്ങളും സ്വർണ്ണത്തെ സുരക്ഷിത നിക്ഷേപമായി കാണാൻ ആളുകളെ പ്രേരിപ്പിക്കും. വർദ്ധിച്ചുവരുന്ന പണപ്പെരുപ്പവും, യുഎസിലെ സാമ്പത്തിക സമ്മർദ്ദങ്ങളും, ഫെഡറൽ റിസർവിന്റെ പലിശനിരക്ക് നയങ്ങളിലെ അനിശ്ചിതത്വവും സ്വർണ്ണത്തിന്റെ ഡിമാൻഡ് വർദ്ധിപ്പിക്കുകയും ചെയ്യും.
സെൻട്രൽ ബാങ്കുകളുടെ പങ്കും ചൈനയുടെ ഇടപെടലും
സ്വർണ്ണവിലയുടെ കുതിപ്പിന് പിന്നിലെ പ്രധാന ചാലകശക്തി വിവിധ രാജ്യങ്ങളിലെ സെൻട്രൽ ബാങ്കുകളായിരിക്കും. ഔദ്യോഗിക കണക്കുകൾ പ്രകാരം സെൻട്രൽ ബാങ്കുകൾ ആദ്യ പാദത്തിൽ വലിയ തോതിൽ സ്വർണ്ണം വാങ്ങിയിട്ടില്ലെന്ന് തോന്നിപ്പിക്കുമെങ്കിലും, വേൾഡ് ഗോൾഡ് കൗൺസിലിന്റെ (WGC) കണക്കുകൾ പ്രകാരം യഥാർത്ഥ വാങ്ങൽ വളരെ ശക്തമാണ്. 2026-ന്റെ ആദ്യ പാദത്തിൽ 244 ടൺ സ്വർണ്ണമാണ് ബാങ്കുകൾ വാങ്ങിക്കൂട്ടിയത്.
ഇതിൽ ഏറ്റവും മുന്നിൽ നിൽക്കുന്നത് ചൈനയാണ്. ചൈനയിലേക്കുള്ള സ്വർണ്ണ ഇറക്കുമതി 2026-ന്റെ ആദ്യ പാദത്തിൽ മൂന്നിരട്ടിയോളം വർദ്ധിച്ച് 317 ടണ്ണിലെത്തി. പീപ്പിൾസ് ബാങ്ക് ഓഫ് ചൈന (PBOC) തങ്ങളുടെ സ്വർണ്ണശേഖരം വൻതോതിൽ വർദ്ധിപ്പിച്ചുകൊണ്ടിരിക്കുകയാണ്. ഡോളറിന് പകരമായി സ്വന്തം കറൻസിയായ യുവാനെ ആഗോളതലത്തിൽ ശക്തിപ്പെടുത്തുന്നതിനുള്ള ചൈനയുടെ തന്ത്രത്തിന്റെ ഭാഗമായാണ് ഈ സ്വർണ്ണ ശേഖരണം വിലയിരുത്തപ്പെടുന്നത്.
Content Highlights: Despite the recent decline in gold prices, market analysts remain optimistic about the long-term outlook. New forecasts suggest that gold could reach fresh record highs by the end of 2026, driven by factors such as central bank demand, economic uncertainty, inflation concerns, and continued investor interest in safe-haven assets.